ہر سگریٹ نوش کو تمباکو نوشی چھوڑنے کے بعد مختلف حالات کا سامنا ہوتا ہے۔ جب آپ تمباکو نوشی چھوڑتے ہیں تو آپ کا جسم اور ذہن نکوٹین کے بغیر رہنے کی عادت ڈالنے لگتے ہیں، تقریباً ہر تمباکو نوش کو نکوٹین چھوڑنے کی علامات کا سامنا کرنا پڑتا ہے۔ اس مضمون میں کچھ ایسی ہی علامات اور ان سے بچنے کے طریقے بیان کیے گئے ہیں۔

جب ایک باقاعدہ تمباکونوش اپنی اس عادت کو چھوڑنے کی کوشش کرتا ہے تو تمباکونوشی کی خواہش اس کےلیے سب سے بڑے چیلنج کے طور پر سامنے آتی ہے۔ یہ خواہش، عادت یا آرزو کبھی زیادہ اور کبھی کم ہوتی ہے۔

تمباکو نوشی کی خواہش اس سے وابستہ خیالات اور ماحول سے پیدا ہوتی ہے، جیسے وہ لوگ جن کے ساتھ آپ سگریٹ نوشی کرتے تھے، وہ جگہیں جہاں آپ سگریٹ پیتے تھے یا وہ چیزیں جنہیں آپ سگریٹ نوشی کرتے وقت استعمال کرتے تھے، جیسے چائے کا کپ۔ تمباکو نوشی کا خیال یا احساس بھی اس خواہش کو بھڑکا سکتا ہے، لیکن آپ کو یاد رکھنا ہوگا کہ آپ نے یہ عادت کیوں چھوڑی تھی۔ اس بات کو بار بار دل اور ذہن میں دہرانا ہوگا۔ یاد رکھیں کہ تمباکو نوشی کی یہ خواہش عارضی ہے اور جلد ہی گزر جائے گی، اور آپ کی مضبوط قوت ارادی سے اس پر قابو پانا ممکن ہے۔

جب آپ تمباکو نوشی چھوڑتے ہیں تو چڑچڑاپن کا سامنا عام بات ہے۔ یہاں تک کہ وہ لوگ جو کبھی تمباکو نوشی نہیں کرتے، وہ بھی جانتے ہیں کہ یہ اس عادت کو چھوڑنے کی وجہ سے ہوتا ہے۔ یہ جاننا کہ یہ معمول کی بات ہے، مددگار ہو سکتا ہے۔ آپ کا جسم نکوٹین کے بغیر رہنے کی عادت ڈال رہا ہے۔ چند گہری سانسیں لیں اور یاد کریں کہ آپ نے تمباکو نوشی کیوں چھوڑی ہے۔

تمباکو نوشی چھوڑنے کے بعد دنوں یا ہفتوں تک بے چینی محسوس کرنا بھی عام بات ہے۔ جس طرح آپ کا دماغ نکوٹین کے بغیر بے چین ہو جاتا ہے، اسی طرح آپ کا باقی جسم بھی بے چین ہو سکتا ہے۔ کچھ جسمانی سرگرمیاں آپ کی بے چینی کو کم کرنے میں مدد کر سکتی ہیں۔ ایک چھوٹا سا واک کریں۔ کافی، چائے اور دیگر کیفین والے مشروبات کو کم کرنے کی کوشش کریں کیوں کہ تمباکو نوشی چھوڑنے کے بعد کیفین آپ کے جسم میں زیادہ دیر تک رہتی ہے۔

تمباکو نوشی چھوڑنے کے پہلے چند دنوں میں آپ کو کسی بھی خیال اور کام پر توجہ مرکوز کرنے میں دشواری ہو سکتی ہے۔ یہ ایک عام نتیجہ ہے۔ آپ دیکھیں گے کہ کچھ سستی باقی رہے گی۔ اگر ممکن ہو تو ان کاموں کو محدود کریں جن میں زیادہ توجہ کی ضرورت ہوتی ہے۔

جب آپ پہلی بار تمباکو نوشی چھوڑتے ہیں تو آپ کی نیند متاثر ہو سکتی ہے۔ اس بارے میں اپنے ڈاکٹر سے جلد از جلد بات کریں کیونکہ اگر آپ کم یا خراب نیند کی وجہ سے تھکے ہوئے ہوں تو عادت سے چھٹکارا حاصل کرنا مشکل ہو سکتا ہے۔ اگر آپ باقاعدگی سے کافی، چائے یا دیگر کیفین والے مشروبات پیتے ہیں، تو انہیں دوپہر یا شام کے وقت سے استعمال نہ کریں کیونکہ تمباکو نوشی چھوڑنے کے بعد کیفین آپ کے جسم میں زیادہ دیر تک رہتی ہے۔ اس کے علاوہ، رات کو سونے سے پہلے ٹی وی دیکھنے یا فون اور کمپیوٹر استعمال کرنے سے گریز کریں۔

جب آپ تمباکو نوشی چھوڑتے ہیں تو آپ کی بھوک میں کچھ اضافہ ہونا عام بات ہے۔ آپ کی سونگھنے اور چکھنے کی حس بہتر ہو جاتی ہے۔ آپ اپنی اس عادت کو چھوڑنے یا اپنے ہاتھوں اور منہ سے کچھ کرنے کی وجہ سے کچھ زیادہ کھانے کی طلب محسوس کرتے ہیں۔ اگر آپ کا وزن بڑھتا ہے تو ورزش شروع کریں کیونکہ کوئی بھی جسمانی سرگرمی کچھ نہ کرنے سے بہتر ہے۔ اگر آپ جم نہیں جا سکتے اور دوڑنا نہیں چاہتے تو صرف چلنا بھی آپ کی صحت کو بہتر بنا سکتا ہے۔ تمباکو نوش افراد میں غیر تمباکو نوش افراد کے مقابلے میں ویسے بھی بے چینی یا ڈپریشن کا رجحان زیادہ ہوتا ہے۔ کچھ لوگ تمباکو نوشی چھوڑنے کے بعد کچھ عرصے کے لیے موڈ میں تبدیلی محسوس کرتے ہیں۔ موڈ میں تبدیلی پر نظر رکھیں، خاص طور پر اگر آپ نے کبھی بے چینی یا ڈپریشن کا سامنا کیا ہے۔ جسمانی طور پر متحرک رہنے سے آپ کا موڈ بہتر ہو سکتا ہے۔

ان لوگوں کے ساتھ رابطے میں رہیں جو آپ کی تمباکو نوشی چھوڑنے کی کوششوں کی حمایت کرتے ہیں۔ اپنے آپ کو ان چیزوں میں مصروف رکھیں جو آپ کو پسند ہیں۔ جیسے میوزک سننا، کتب بینی یا فلم دیکھنا وغیرہ۔ اگر آپ چند ہفتوں میں بہترمحسوس نہیں کرتے یا آپ کی علامات برقرار رہتی ہیں تو آپ کو ڈاکٹر سے رجوع کرنا چاہیے۔